林建岳

香港樂壇就好似一個大家庭，歌手、作曲人、填詞人，大家平時都係好朋友，不過好似王菀之（Ivana）同張敬軒（Hins）咁，喺舞台上如此有默契，都幾難得。上個周末，Ivana同Hins首次合作開concert《The Magical Teeter Totter張敬軒•王菀之演唱會2017》，一連四晚於紅館上演。

韓國娛樂文化強勁，「韓風」席捲亞洲以至全球。人氣男團EXO上個周末嚟到香港，一連兩晚喺Asia World Expo演唱會。不少年輕朋友鍾情韓星，而家交通愈來愈方便，各地年輕人亦都興起到周邊地區睇show順道旅行。今次喺亞洲博覽館開show，雖然離市區較遠，不過對於專程搭飛機來港嘅海外歌手同fans嚟講，位置fit晒。如果將來啟德體育園區嘅場館落成啟用，搭郵輪嚟香港睇show，似乎也是不錯的選擇，更加可以帶旺消費和過夜旅客增長。

上星期六，由香港文化產業聯會總會（文聯會）與香港絲路文化協會聯合主辦嘅「一帶一路系列：古絲路文化研討會」，喺香港中央圖書館舉行。對於絲綢之路呢個concept，有啲朋友可能不太熟悉，但講到文化交流，相信大家一定唔會陌生。香港可以話係東西方文化交流嘅重要窗口之一，就好似位於深水埗嘅李鄭屋漢墓，相信不少朋友都去過，古墓中穹頂結構的靈感原來係來自波斯，呢個對研究古絲路文化有重要意義。面對國家「一帶一路」發展戰略，如果我哋可以把握機遇、充份發揮香港嘅獨特優勢，相信可以打造出「一帶一路」下，最理想嘅國際文化交流平台，推動本港文化產業發展再創高峰。

喺東京舉行嘅發佈會，旅發局推出四條全新宣傳片，由港人嘅角度去遊歷香港、感受香港，帶領旅客跟隨我們腳步發掘最地道旅程。我哋仲請到兩位日本「香港迷」義務做「代言人」，一位係人氣強勁嘅影星水原希子，另一位係銀座久兵衛主廚今田洋輔，我即場頒發「星級香港迷」證書多謝佢哋支持。今年旅發局會繼續加強海外市場嘅推廣，以及舉辦mega event並加入更多新元素，希望可以吸引更多過夜旅客，做旺本港旅遊業，做足「好客之都」的宣傳。

農曆新年是許多人一年中最期待嘅節日。記得小時候，老人家話過年最緊要係有「年味」，享受一家團圓嘅傳統節日喜慶氣氛。香港每年都有好多「年味」十足嘅賀歲盛事，包括年宵花市、花車巡遊、煙花匯演、賀歲賽馬等等，旅發局亦一直推廣呢啲應節活動，希望可以吸引更多旅客來港過年，體驗別具本地特色的「年味」。乘辭舊迎新之際，在這裏祝各位讀者雞年大吉大利，更祝香港新一年風調雨順。

港產電影多年來風靡全球，近至東南亞、遠至美加，有華人嘅地方，就有香港電影。時代在變，電影產業也在變，近年香港電影在拍攝製作上不斷創新，加入更多新元素，包括電影題材、拍攝地點、演員製作人、以至合作方式等方面都有更多新嘅嘗試。

香港絕對係美食天堂，不但港式地道美食琳瑯滿目，世界各地嘅菜式亦都應有盡有。熟悉我嘅朋友都知道，我向來鍾意到處搵美食，比較大型食肆，有時身處鬧市之中嘅小餐館反而更加精緻、更具特色。不過近年一些出色而受歡迎的餐廳，可能因為成本壓力等原因，逐漸消隱、買少見少，十分可惜。

一直以來，香港都係中西文化交匯嘅地方。就喺我中環辦公室附近，不但有現代的商業大廈，更有古色古香嘅傳統建築，以及為數唔少嘅傳統富中國特色樓宇。香港，就係一個融合古今、匯聚中西的國際都會，如果有人話香港係文化沙漠，我絕對唔會認同。獨特嘅歷史文化底蘊正是香港魅力所在，讓世界各地旅客慕名而來。近日政府計劃於西九文化區興建「香港故宮文化博物館」，並與北京故宮博物院合作，定期展出故宮珍藏，相信將會有助加快推動本港文化旅遊發展。

香港素有「亞洲美食之都」美譽，港式地道美食一直深受世界各地朋友喜愛。好多時旅客嚟香港，除咗係想在旅遊區試下新穎食品之外，佢哋最想體驗嘅，係香港最地道的大眾化小食：好似臭豆腐、雞蛋仔，唔少訪港旅客都要跑去試一下。我真係好希望有一日，有更多嘅港式地道美食，可以入選米芝蓮。更重要嘅係，我哋要思考如何在承傳方面多下工夫。